“A xente que traballa no mundo rural achega valores intanxibles como a seguridade dos bosques e a preservación da biodiversidade”, afirmou nunha entrevista a Efe este antigo bombeiro, que agora contribúe desde a fundación que dirixe á concienciación da sociedade sobre os riscos que entrañan os sinistros forestais.

“O abandono do medio rural e de actividades tradicionais” como a gandería, a agricultura ou a talla sostible son “algunhas das principais razóns” que explican este progresivo incremento de grandes incendios en España, aos que hai que sumar “outros factores como o aumento das temperaturas e o ciclo irregular de choivas que se derivan do cambio climático”.

Vendrell advirte de que o afastamento humano da Natureza provocou un aumento da masa forestal que favorece que os incendios se propaguen con maior intensidade e calcinen unha superficie moito maior, e por iso considera “un erro pensar que ter máis bosques equivale a valores superiores de biodiversidade”.

Na súa opinión, “necesitamos unha paisaxe máis diversa”, alternando as zonas arborizadas tamén con espazos abertos, zonas de pasto ou terras destinadas á agricultura.

Segundo datos do recente informe anual de incendios forestais ‘Paisaxes cortalumes’ publicada pola organización ecoloxista WWF, a cifra de incendios de gran magnitude elevouse un 12 % no último decenio e, de feito, a 18 do pasado mes de xullo, o Ministerio para a Transición Ecolóxica e o Reto Demográfico ( MITECO) contabilizara xa media ducia de grandes incendios, o dobre que no mesmo período de 2020, que finalizou con 19 incendios deste tipo.

Para frear esta dinámica, Vendrell pide centrar os esforzos en promover a prevención de incendios antes que a súa extinción, debido a que “mandar bombeiros a extinguir un lume é só o resultado dun problema, non a solución”, que debería vir dunhas mellores políticas preventivas.

Neste sentido, a estratexia “debe pasar por mellorar a xestión da contorna natural”, para o que resulta fundamental que a xente das zonas rurais “poida vivir dignamente da nosa paisaxe forestal a través de actividades de aproveitamento forestal e rural”, o que require á súa vez que os bens que producen teñan “un valor de mercado digno”.

Aínda que este novo achegamento humano aos montes podería ter como consecuencia indesexada un maior número de pequenos incendios,  Vendrell sostén que reduciría o dos grandes lumes, ao substituír parte da masa forestal descoidada por terras de labor e actuar os veciños como vixías da contorna, anticipando a alerta en caso de conato de incendio.

En todo caso, “non todo o territorio ten que ser xestionado ou traballado…, o que ten que estar é balanceado”, engadiu.

Para un futuro inmediato, alerta de que a cantidade de grandes incendios forestais en España continuará aumentando se seguen as mesmas condicións actuais.

O problema dos incendios é “extremadamente complexo e non se pode abordar con solucións simples”, sentenza, argumentando que en España non se pode establecer unha estratexia “igual para todo o mundo” debido á gran diversidade de ecosistemas e paisaxes distintos cos que conta o territorio nacional. 

Imaxe por Rudy and Peter Skitterians en Pixabay